Jugilager 2017 – Freitag
Nachdem mir hüt mitem Schacher Seppli gweckt worde sind und e feins zMorge gesse hei, sind mir wie jede Morge unser Lagertanz go iebe. Denn hets dusse Chorballtraining für die Grosse ge und Badminton in dr Halle für die Chline. Wo mir fertig gsi si, hets e Wächsel ge.
Nach dem sportliche Teil hets e mega feins zMittag ge, Lasagne! Dank dere guete Sterki hei mir wieder Energie ka. Die hei mir au brucht, denn es het jetzt e Lichtathletikwettkampf ge. Obwohl s Wetter dr ganz Tag schlecht gsi isch, sind alli top motiviert gsi. Zum jetzige Zitpunkt wüsse mir leider noni d Resultat und d Räng vom Wettkampf.
Unser zNachtesse isch hüt Ris Casimir und wie immer mega guet gsi. Hüt Zobe isch dr Buntobe und alli freue sich extrem druf.
Leider isch s Lager jetzt denn au scho wieder ferbi und ich glaub ich cha für alli rede wenn ich säg dass es e mega tolls Lager gsi isch und mir uns alli scho ufs nexte freue!